Department of State Services don release all the seven judge wey dem arrest for Friday and Saturday from five states and the Federal Capital Territory.
Eye wey sabi see well well tok sey na Sunday night dem release the Judges, but na for Monday morning dem come finally leave the Judges mek dem go house.
The Judges wey dem been arrest na Sylvester Ngwuta and Inyang Okoro, or wey dey work for Supreme Court; Presiding Justice of the Court of Appeal wey dey suspension, for Ilorin Division, Justice Mohammed Tsamiya; Justice Kabiru Auta wey dey Kano State High Court and Justice Adeniyi Ademola wey dey work for Federal High Court, Abuja.
Oda pipo wey follow enta the gbege na former Chief Judge of Enugu State, Justice I. A. Umezulike, and Muazu Pindiga wey dey work for Federal High Court, Gombe Division.
Pesin wey sabi the two judges for the Supreme Court, tok sey him see the Judges dem today.
“Yes, I can tell you categorically that the two judges had been released.
“I saw them today. They were to be part of the send forth we did for one of the judges this morning, but they couldn’t make it because they were asked to return to the DSS for further questioning,” na so the pesin tok am oo.
Him also yan sey na only question DSS ask the Judges bifor dem leave dem mek dem go house.